ონლაინ შეხვედრაზე ანა ანთაძე და ანჯელა რენილსონი ისაუბრებენ ინტუიციაზე, მის მნიშვნელობასა და მასთან კავშირზე. ინტუიცია ყველა ადამიანს აქვს. კოლექტიური თუ ინდივიდუალური ტრავმების გამო კი ხშირად ის სუსტდება და მასთან გაუცხოების განცდა გვიჩნდება.
შეხვედრაზე შევეხებით საკითხებს: რა კოლექტიური მიზეზები შეიძლება იწვევდეს საკუთარ ინტუიციასთან გაუცხოებას და როგორ მოვიქცეთ ამ დროს? როგორ აღვადგინოთ ინტუიციასთან კავშირი და როგორ მოვუსმინოთ მას? რა როლს ასრულებს ინტუიცია საკუთარ წინაპრებთან დაახლოებაში?
რატომ წინაპრებთან დაკავშირება?
თანამედროვე საზოგადოება ბევრ გადაუმუშავებელ წინაპრულ ტვირთს ატარებს, რაც ვლინდება ჩვენს ინდივიდუალურ, კოლექტიურ, პოლიტიკურ თუ ეკონომიკურ რეალობაში. როდესაც წინაპრული ველი გადატვირთულია გადაუმუშავებელი კოლექტიური ტრავმებით, ეს აისახება ჩვენს, როგორც ინდივიდების, ასევე კოლექტივის რეალობაზე.
ინდივიდუალური ტრავმების მსგავსად, კოლექტიური ტრავმები მოითხოვს კურნებას, რათა რეპრესიული ჯაჭვები გაწყდეს და აღარ განმეორდეს. წინაპრებს დიდი წვლილი მიუძღვით ჩვენი დღევანდელი პოლიტიკური, სოციალური, ეკონომიკური თუ ინდივიდუალური რეალობის შექმნაში. ისტორიაში განმეორებული ძალადობები, ომი, შიდა არეულობები, ძალაუფლების არასწორად გადანაწილება და სხვა პრობლემები წინაპართაგან გადმოცემული კოლექტიური ტვირთებია, რაც აფერხებს სასიკეთო განვითარებას.
იმისათვის, რომ გავთავისუფლდეთ თაობებისგან გადმოცემული წნეხებისგან, დავიბრუნოთ პერსონალური ძალაუფლება და წარმატებით ჩავერთოთ საზოგადოებრივი საქმეების რეაბილიტაციაში, მნიშვნელოვანია წინაპართა კოლექტიური ველის გაწმენდა, გაჯანსაღება და გამთელება.
